سياسة الخصوصية
باختصار: بنجمع أقلّ إشي ممكن. للحساب بنطلب إيميلك بس — ما في اسم ولا عنوان ولا تاريخ ميلاد. ولمّا تراسلنا من نموذج التواصل بنطلب اسمك ورقمك كمان، لأنه بدونهم ما منقدر نردّ عليك.
آخر تحديث: ١٠ أغسطس ٢٠٢٦شو بنجمع؟
الإيميل — للحساب، وهو الوحيد اللي بنطلبه عشان تسجّل. بنستخدمه لتسجيل دخولك ولربط الدورات اللي اشتريتها بحسابك.
تقدّمك بالدورة — أي دروس خلّصتها، عشان تكمل من وين وقفت.
تقييمك إذا كتبت واحد — النجوم والنص اللي بتكتبه بنفسك.
بيانات نموذج التواصل — إذا راسلتنا. مفصّلة كاملة بالقسم اللي بعده.
ما في صفحة ملف شخصي، وما بنطلب عنوانك ولا تاريخ ميلادك ولا أي إشي ما إلنا حاجة فيه.
لمّا تراسلنا
شو بنطلب: الاسم والإيميل ورقم الهاتف ونوع الطلب ونص رسالتك. اسم الشركة اختياري. كلها لهدف واحد: إنّه نقدر نردّ عليك.
ليش الرقم مطلوب: لأنه أسرع طريقة نرجعلك فيها — غالباً على واتساب بنفس اليوم.
عنوان الـ IP: ما بنخزّنه. بنخزّن بصمة مشفّرة منه (salted hash) عشان نمنع الرسائل المزعجة والإرسال الآلي المتكرّر. البصمة ما بترجع لعنوان، ولا منقدر نعرف مين إنت منها.
نوع المتصفّح والجهاز — بنخزّنه عشان إذا كانت مشكلتك تقنية نقدر نفهمها بدون ما نسألك عنها.
تنبيه على Telegram: أول ما توصل رسالتك بيوصلنا تنبيه فيه اسمك وإيميلك ورقمك ونص رسالتك، عشان نردّ بسرعة. Telegram بتشوف هالتنبيه.
كم بنحتفظ فيها: لحد سنتين من آخر تواصل بيننا، وبعدها بتنحذف. وبتقدر تطلب حذفها قبل هيك بأي وقت.
شو ما بنجمعه؟
بيانات بطاقتك — ما بتمرّ علينا ولا بنخزّنها. الدفع كله بصير عند Stripe.
ما بنبيع بياناتك ولا بنأجّرها ولا بنشاركها مع معلنين. أبداً.
مين بيشوف بياناتك؟
Supabase — بتخزّن الحساب والتقدّم.
Stripe — بتعالج الدفع بالبطاقة.
Vimeo — بتستضيف الفيديوهات، ومقفولة على نطاق qacart.com.
Vercel — بتشغّل الموقع، وسجلّاتها التقنية بتشوف عنوان الـ IP زي أي استضافة.
Telegram — بيوصلها تنبيه رسالتك إذا راسلتنا من نموذج التواصل.
كل واحدة منهم بتشوف بس اللي بتحتاجه عشان تشتغل. وما بنبيع بياناتك لأي حدا.
الرسائل
رموز تسجيل الدخول بتوصلك لأنك طلبتها.
رسائل تسويقية بتوصلك بس إذا وافقت صراحةً، وفي رابط إلغاء اشتراك بكل رسالة بشتغل من أول ضغطة.
حقوقك
بتقدر تطلب نسخة من بياناتك، أو تطلب حذف حسابك بالكامل — بنحذف الحساب والتقدّم والتقييمات، ورسائلك اللي بعتّها من نموذج التواصل.
ابعتلنا على hello@qacart.com من نفس الإيميل المسجّل ومنكمّل خلال أيام. ومنقبل الطلب كمان من صفحة «تواصل معنا».
ملاحظة: حذف الحساب بيلغي وصولك للدورات اللي اشتريتها، وما في استرجاع للمبلغ.
الكوكيز
بنستخدم كوكي واحد أساسي: اللي بيخلّيك مسجّل دخول. ما في كوكيز تتبّع ولا إعلانات.
في إشي مش واضح بهالصفحة، أو بدك تطلب نسخة من بياناتك أو حذفها؟ اسألنا ومنردّ خلال يوم عمل.